مودی کے دورے کے دوران سڑکوں پر ٹریفک محدود رکھنے کا فیصلہ

وزیراعظم نریندر مودی کے دورے کے باعث ہفتہ کو کولکتہ کی سڑکوں پر ٹریفک کی نقل و حرکت کو کنٹرول کرنے کا منصوبہ کولکتہ پولیس نے تیار کیا ہے۔ اس سلسلے میں جمعرات کو ایک نوٹیفکیشن جاری کیا گیا ہے۔ ہفتہ کو شہر کی کئی سڑکوں پر ٹریفک محدود رہے گی۔ صبح 4 بجے سے رات 8 بجے تک ایل پی جی سلنڈر، تیل اور ضروری اشیائ کے علاوہ کسی بھی دوسری بھاری گاڑی کو شہر میں داخل ہونے کی اجازت نہیں ہوگی۔
اضلاع میں منگل کو بی جے پی کی ‘پریورتن یاترا’ ختم ہو گئی ہے۔ ہفتہ کو کولکتہ میں اس کے اختتامی مرحلے پر بریگیڈ میں ایک جلسہ عام منعقد ہو رہا ہے، جس میں وزیراعظم مودی شرکت کریں گے۔ اس موقع پر کولکتہ پولیس نے ٹریفک کو کنٹرول کرنے کا منصوبہ بنایا ہے۔ نوٹیفکیشن میں بتایا گیا ہے کہ ہفتہ کو ایسپلانیڈ ریمپ، کے پی روڈ، ہسپتال روڈ، لوورس لین، کیسورینا ایونیو اور کوئنز وے پر ٹریفک کنٹرول طریقے سے چلے گی۔ ضرورت کے مطابق ہدایات دی جائیں گی، اور اگر ضروری ہوا تو گاڑیوں کا رخ ان سڑکوں سے دوسرے راستوں کی طرف موڑا جا سکتا ہے۔ ہفتہ صبح 4 بجے سے رات 8 بجے تک شہر میں کوئی بھاری گاڑی نہیں چلے گی۔ صرف ایل پی جی سلنڈر، تیل، سی این جی، پٹرولیم، آکسیجن، چکنا کرنے والے مادے (Lubricants)، سبزیاں، ادویات، پھل، مچھلی اور دودھ لے جانے والی بھاری گاڑیوں کو استثنیٰ حاصل ہوگا۔