مالدہ میں این آءاے نے تین مسلم نوجوانوں کو گرفتار کیا

مالدہ کے موتھاباری واقعہ میں نیشنل انویسٹی گیشن ایجنسی (NIA) نے کل تین افراد کو گرفتار کیا ہے۔ ایک آئی ایس ایف (ISF) لیڈر کے بعد اب دو کانگریس لیڈروں کو گرفتار کیا گیا ہے، جن کے نام شاہادت حسین اور آصف شیخ ہیں۔پولیس ذرائع کے مطابق، اتوار کو مالدہ کے ان دو کانگریس لیڈروں کو پوچھ گچھ کے لیے بلایا گیا تھا۔ ان کے بیانات میں تضاد پائے جانے کے بعد دونوں کو گرفتار کر لیا گیا۔ اس سے قبل غلام ربانی نامی شخص کو گرفتار کیا جا چکا ہے۔ یہاں تک کہ موتھاباری اسمبلی حلقہ کے کانگریس امیدوار صائم چودھری سے بھی این آئی اے نے طویل پوچھ گچھ کی، تاہم بعد میں انہیں چھوڑ دیا گیا۔
مالدہ کے موتھاباری میں ایس آئی آر (SIR) کے کام کے دوران ججوں کو محصور کرنے کے واقعے میں سپریم کورٹ کی ہدایت پر این آئی اے نے کولکتہ کی خصوصی سی بی آئی عدالت میں 12 ایف آئی آر درج کی ہیں۔ این آئی اے ذرائع کے مطابق، یہ مقدمات بھارتیہ نیائے سنہتا کی دفعات کے تحت اقدام قتل، ناجائز طور پر قید کرنے، غیر قانونی اجتماع، غیر قانونی ہجوم کو ہٹانے کے دوران سرکاری ملازمین پر حملہ، سرکاری کام میں رکاوٹ ڈالنے، سرکاری احکامات کی خلاف ورزی، سرکاری ملازم پر تشدد، سرکاری املاک کی توڑ پھوڑ، مجرمانہ دھمکی اور طویل عرصے تک نیشنل ہائی وے بلاک کرنے کے الزامات میں درج کیے گئے ہیں۔