بی جے پی لیڈر راکیش سنگھ کو عبوری ضمانت

بالآخر کلکتہ ہائی کورٹ نے بی جے پی لیڈر راکیش سنگھ کی عبوری ضمانت منظور کر لی ہے۔ پیر کے روز جسٹس کوشک چند نے ان کی ضمانت کی درخواست قبول کی۔ عبوری ضمانت ملنے کے بعد راکیش نے گاڑی میں بیٹھے ہوئے اپنی ایک تصویر فیس بک پر پوسٹ کی ہے، جس کے کیپشن میں انہوں نے کلکتہ پورٹ سے ترنمول امیدوار اور ریاستی وزیر فرہاد حکیم کو نشانہ بنایا اور پولیس پر تنقید کرتے ہوئے لکھا کہ ‘سچ کی جیت ہوئی ہے’۔

بی جے پی لیڈر راکیش کو پولیس نے ستمبر 2025 میں کلکتہ کے ٹینگرا علاقے سے گرفتار کیا تھا۔ ان پر ودھان بھون (کانگریس دفتر) میں توڑ پھوڑ اور ہنگامہ آرائی کا الزام تھا، جو مبینہ طور پر بہار میں راہول گاندھی کی ریلی میں ‘قابل اعتراض تبصروں’ کے خلاف کیا گیا تھا۔ اس واقعے کے بعد سے وہ روپوش تھے، تاہم بعد میں پولیس نے جن چار افراد کو گرفتار کیا ان میں راکیش کے بیٹے شیوم سنگھ بھی شامل تھے۔ اینٹالی تھانے میں راکیش کے خلاف اسلحہ ایکٹ سمیت کئی دفعات کے تحت مقدمہ درج کیا گیا تھا۔