زمین پر قبضے کے معاملے میں دیباشیش کمار کو ای ڈی کا سمن

کولکتہ: انتخابات سے قبل زمین پر قبضے کے کیس میں دیباشیش کمار ای ڈی کے ریڈار پر ہیں۔ راس بہاری سے ترنمول کانگریس کے امیدوار دیباشیش کمار سی جی او کمپلیکس میں ای ڈی کے دفتر میں حاضر ہوئے۔ معلوم ہوا ہے کہ گزشتہ ہفتہ کو جنوبی کولکتہ کی ایک تعمیراتی کمپنی کے دفتر پر ای ڈی نے چھاپہ مارا تھا۔ اس کمپنی پر الزام ہے کہ اس نے میونسپل کارپوریشن کی مدد سے مختلف مقامات پر زمینوں پر قبضہ کیا اور تعمیراتی منصوبے مکمل کیے۔ دیباشیش کمار کے علاقے میں بھی اس قسم کی تعمیرات ہوئی ہیں۔ غیر قانونی تعمیرات سے متعلق شکایات موصول ہونے کے بعد مرکزی تحقیقاتی ایجنسی نے تلاشی لی، جس کی بنیاد پر دیباشیش کمار کو طلب کیا گیا ہے۔ پیر کے روز انہیں طلب کیا گیا اور ان کا بیان ریکارڈ کرنے کا عمل بھی شروع کر دیا گیا ہے۔