مگراہاٹ میں ہنگامہ آرائی, الیکشن کمیشن کے مبصر کا گھیراﺅ

ہگلی29دسمبر: جنوبی 24 پرگنہ کے علاقے مگراہاٹ کے شیراکول ہائی اسکول میں جب قومی الیکشن کمیشن کے مبصر سی مروگن سماعت کا جائزہ لینے پہنچے، تو مقامی لوگوں نے انہیں گھیر کر شدید احتجاج کیا۔مظاہرین کا الزام ہے کہ ووٹر لسٹ کی نظرثانی (SIR) کے نام پر بوڑھوں، بیماروں اور معذور افراد کو طویل قطاروں میں کھڑا کر کے ہراساں کیا جا رہا ہے۔ مشتعل عوام کا مطالبہ ہے کہ بزرگوں اور معذور افراد کے لیے ان کے گھر جا کر سماعت کی جانی چاہیے۔ اس کے علاوہ، سماعت کے دوران BLA-2 کارکنوں کے داخلے پر پابندی کے خلاف بھی ناراضگی کا اظہار کیا گیا۔ ترنمول کانگریس کے رہنما ابھیشیک بنرجی نے اس معاملے پر پہلے ہی سوال اٹھایا تھا کہ اگر بزرگوں کے لیے پوسٹل بیلٹ کی سہولت ہو سکتی ہے، تو سماعت کے لیے انہیں جسمانی طور پر حاضر ہونے پر کیوں مجبور کیا جا رہا ہے۔کافی دیر تک جاری رہنے والے احتجاج کے بعد پولیس نے مداخلت کر کے صورتحال پر قابو پایا۔ ترنمول کانگریس اس معاملے پر کمیشن کو اپنا وفد بھیجنے کی تیاری کر رہی ہے۔