جنوبی بنگال کے 6 اضلاع میں شدید بارش کا امکان، تیز ہواو¿ں کا الرٹ

درگا پوجا ختم ہوتے ہی خلیج بنگال میں سمندری طوفان کا خطرہ منڈلانے لگا ہے۔ کم دباو¿ کا علاقہ بن چکا ہے۔ علی پور محکمہ موسمیات نے بتایا ہے کہ پیر کی صبح تک سمندر میں سمندری طوفان بن سکتا ہے۔ اس کے بعد یہ آہستہ آہستہ ساحل کی جانب بڑھے گا۔ اس کے اثر سے جنوبی بنگال کے وسیع علاقوں میں شدید بارش اور تیز ہواو¿ں کے ساتھ طوفانی موسم کا امکان ہے۔ اسی لیے پہلے ہی احتیاطی تدابیر اختیار کرنے کی ہدایت دی گئی ہے۔
محکمہ موسمیات کے مطابق، جمعہ کو مشرقی وسطی خلیج بنگال اور اس سے متصل جنوب مشرقی خلیج بنگال میں کم دباو¿ کا علاقہ بنا ہے۔ اس کے اطراف سمندر کی سطح سے 5.8 کلومیٹر کی بلندی پر گردابی ہواو¿ں کا نظام موجود ہے۔ یہ کم دباو¿ کا علاقہ مزید شدت اختیار کرتے ہوئے ہفتہ کو کم دباو¿ میں تبدیل ہو جائے گا۔ مغرب اور شمال مغرب کی جانب بڑھتے ہوئے اتوار تک یہ گہرے کم دباو¿ کے علاقے میں تبدیل ہو سکتا ہے۔ پیر کی صبح تک سمندر میں اس گہرے کم دباو¿ سے سمندری طوفان جنم لے سکتا ہے۔ اگلے دو دنوں میں یہ مزید طاقت حاصل کرکے شمالی آندھرا پردیش اور جنوبی اڈیشہ کے ساحلوں کی جانب بڑھے گا۔ اس کے اثر سے بدھ سے جنوبی بنگال میں بارش اور تیز ہوائیں چلنے کا امکان ہے۔
کولکاتا میں بدھ سے جمعہ تک وقفے وقفے سے ہلکی بارش، بجلی کڑکنے اور تیز ہوائیں چلنے کا امکان ہے۔ ہوا کی رفتار 30 سے 40 کلومیٹر فی گھنٹہ رہ سکتی ہے۔ ہاوڑہ، ہوگلی، شمالی 24 پرگنہ، مشرقی بردوان، مغربی بردوان، بیر بھوم، مرشدآباد اور نادیہ میں بھی اسی طرح کے موسم کی پیش گوئی کی گئی ہے۔
تاہم، جنوبی بنگال کے چھ اضلاع میں بدھ سے شدید بارش کا امکان ہے، جس کے دوران 7 سے 11 سینٹی میٹر تک بارش ہو سکتی ہے۔ جنوبی 24 پرگنہ اور مشرقی مدنی پور میں بدھ کو، جبکہ مغربی مدنی پور اور جھاڑگرام میں بدھ سے جمعہ تک مسلسل شدید بارش ہو سکتی ہے۔ اس کے علاوہ پرولیا اور بانکوڑا میں جمعرات اور جمعہ کو شدید بارش کی پیش گوئی کی گئی ہے۔ منگل کو جنوبی 24 پرگنہ اور دونوں مدنی پور اضلاع میں وقفے وقفے سے بارش ہوگی۔