مدھیامک کا ریزلٹ امتحان کے بعد 90دنوں کے اندر جاری کر دیا جائے گا

کولکاتا7فروری :ریاست میں چند ماہ بعد اسمبلی انتخابات ہونے والے ہیں۔ اس دوران طلبہ اور والدین میں یہ بحث شروع ہو گئی ہے کہ کیا میٹرک کا رزلٹ انتخابات کے بعد آئے گا؟ ہفتہ کے روز بیربھوم کے دورے کے دوران بورڈ کے صدر ڈاکٹر رامانوج گنگوپادھیائے نے نتائج کے حوالے سے اہم معلومات فراہم کیں۔انہوں نے بتایا کہ ہر سال کی طرح اس بار بھی میٹرک کا رزلٹ تقریباً 90 دنوں کے اندر جاری کر دیا جائے گا۔ تاہم، نتائج کی قطعی تاریخ کا اعلان بعد میں بورڈ کی جانب سے باقاعدہ نوٹیفکیشن کے ذریعے کیا جائے گا۔ ہفتہ کو جغرافیہ کے امتحان کے دوران انتظامات کا جائزہ لینے کے لیے انہوں نے بولپور کے شری نندا ہائی اسکول اور دواروندا چنڈی ماتا ہائی اسکول کا دورہ کیا۔ اسکولوں کے بنیادی ڈھانچے اور انتظامات کو دیکھ کر انہوں نے اطمینان کا اظہار کیا اور امید ظاہر کی کہ یہ اسکول ریاست کے دیگر اسکولوں کے لیے ایک مثال ثابت ہوں گے۔واضح رہے کہ اس سال میٹرک کے امتحانات 2 فروری سے شروع ہوئے ہیں جو 12 فروری تک جاری رہیں گے۔ امتحان روزانہ صبح 10:45 بجے شروع ہوتا ہے اور دوپہر 2:00 بجے ختم ہوتا ہے، جبکہ طلبہ کو سوالنامہ پڑھنے کے لیے 15 منٹ کا اضافی وقت دیا جاتا ہے۔ اس سال کل 9 لاکھ 71 ہزار 340 امیدوار امتحان دے رہے ہیں، جن میں 4 لاکھ 26 ہزار 733 طلبہ اور 5 لاکھ 44 ہزار 606 طالبات شامل ہیں۔ ریاست بھر میں کل 2,682 مراکز پر امتحانات منعقد کیے جا رہے ہیں۔ بورڈ نے پیپر لیک ہونے سے روکنے کے لیے سخت قوانین نافذ کیے ہیں اور موبائل، اسمارٹ واچ اور دیگر الیکٹرانک آلات پر مکمل پابندی عائد ہے۔