اس سال کے آخر میں ہوڑہ میونسپل کارپوریشن کا چناﺅ ہوگا

مغربی بنگال کے نو منتخب وزیر اعلیٰ شبھیندو ادھیکاری نے ہاوڑہ میونسپل کارپوریشن (HMC) کے حوالے سے ایک بڑا اعلان کرتے ہوئے کہا ہے کہ رواں سال کے آخر تک یہاں بلدیاتی انتخابات کرائے جائیں گے۔ ہاوڑہ میں آخری بار بلدیاتی انتخابات ۱۳ سال قبل ہوئے تھے اور گزشتہ آٹھ سالوں سے یہاں کوئی منتخب بورڈ موجود نہیں تھا، بلکہ ایڈمنسٹریٹر (پورو پرشاسک) کے ذریعے ہی کام چلایا جا رہا تھا۔
وزیر اعلیٰ نے امید ظاہر کی کہ دسمبر کے مہینے تک انتخابات کا عمل مکمل کر لیا جائے گا۔ انہوں نے یہ بھی واضح کیا کہ انتخابات سے قبل وارڈوں کی نئی حد بندی (Delimitation) کی جائے گی اور کارپوریشن میں ماضی میں ہونے والی مالی بے ضابطگیوں کی اعلیٰ سطحی جانچ ہوگی۔انتخابات کے اعلان کے ساتھ ہی وزیر اعلیٰ شبھیندو ادھیکاری نے ہاوڑہ میونسپل کارپوریشن کے انتظامی امور اور کرپشن پر سخت رخ اپناتے ہوئے درج ذیل حقائق سامنے رکھے۔ وزیر اعلیٰ نے انکشاف کیا کہ ہاوڑہ میونسپل کارپوریشن میں اس وقت تقریباً ۱۷۰۰ عارضی ملازمین کام کر رہے ہیں۔ انہوں نے سنگین الزام لگاتے ہوئے کہا کہ ان ۱۷۰۰ ملازمین میں سے کم و بیش ۵۰۰ افراد ایسے ہیں جو کوئی کام کیے بغیر ہی ہر ماہ باقاعدگی سے سرکاری خزانے سے تنخواہ لے رہے ہیں۔انہوں نے واضح کیا کہ اس پورے گھپلے کی باریک بینی سے تفتیش کی جائے گی اور ملوث افراد کے خلاف سخت قانونی کارروائی عمل میں لائی جائے گی۔ہاوڑہ میں طویل عرصے سے معطل بلدیاتی انتخابات اور وہاں انتظامی سطح پر بدعنوانی کی شکایات عوامی حلقوں میں ایک بڑا مسئلہ رہی ہیں۔ نئی حکومت کی جانب سے جیٹ کی رفتار سے لیے گئے اس فیصلے کے بعد، جہاں ایک طرف ہاوڑہ کے شہریوں کو ۱۳ سال بعد اپنا مقامی نمائندہ منتخب کرنے کا موقع ملے گا، وہیں دوسری طرف کارپوریشن کے کرپشن نیٹ ورک پر بھی شکنجہ کسا جائے گا۔