بنگال میں سردی نے اپنا جوہر دکھانا شروع کر دیا

کولکتہ25دسمبر: ایسا لگتا ہے کہ کرسمس پر سانٹا کلاز نے سردی کا تحفہ دیا ہے۔ 25 دسمبر کو ہی بنگال نے اس سیزن کا سرد ترین دن دیکھا۔ شمال سے جنوب تک ہر جگہ درجہ حرارت میں کمی آئی ہے۔ مغربی ڈسٹربنس (جھنجھا) کا اثر ختم ہوتے ہی سردی نے زبردست واپسی کی ہے۔ کولکتہ کا درجہ حرارت اچانک گر کر 13 ڈگری پر آ گیا ہے، جبکہ کئی اضلاع میں پارہ 10 ڈگری یا اس سے بھی نیچے چلا گیا ہے۔

بدھ کے روز علی پور (کولکتہ) کا درجہ حرارت 13.7 ڈگری سیلسیس ریکارڈ کیا گیا، جبکہ مغربی اضلاع میں پارہ 10 سے 11 ڈگری کے درمیان گردش کر رہا ہے۔ ماہرینِ موسمیات کا کہنا ہے کہ اگلے دو دنوں میں سردی میں مزید اضافہ ہوگا اور سال کے آخری دن تک اس لہر میں کوئی رکاوٹ آنے کا امکان نہیں ہے۔

رواں سیزن میں پہلی بار بانک±وڑا کا درجہ حرارت 10 ڈگری سے نیچے گرا ہے؛ یہاں کا کم سے کم درجہ حرارت 9.1 ڈگری سیلسیس ریکارڈ کیا گیا۔ کرسمس کے موقع پر ہڈیوں کو کپکپا دینے والی سردی نے لوگوں کو گھروں میں دبکنے پر مجبور کر دیا ہے۔ ایک طرف شدید ٹھنڈ اور دوسری طرف صبح سے چھائی دھند کی وجہ سے سڑکیں سنسان نظر آئیں۔ کئی جگہوں پر لوگ سڑک کنارے آگ جلا کر سردی سے بچنے کی کوشش کرتے دکھائی دیے۔