صبح سویرے ہی کولکاتا کے کئی مقامات پر ای ڈی کے چھاپے

صبح سویرے ایک بار پھر کولکاتا میں ای ڈی کا آپریشن شروع ہوا۔ مرکزی تفتیشی ایجنسی نے شہر کے کئی مقامات پر چھاپے مارے۔ کولکاتا کے بالی گنج اور نیو علی پور کے متعدد مقامات پر تلاشی جاری ہے۔ لیکن یہ کارروائی کیوں کی جا رہی ہے؟ ابتدائی طور پر معلوم ہوا ہے کہ مالی بدعنوانی سمیت بڑی رقم بیرونِ ملک منتقل کرنے کے معاملے کی تحقیقات کے سلسلے میں یہ کارروائی کی جا رہی ہے۔
انفورسمنٹ ڈائریکٹوریٹ (ای ڈی) کی جانب سے بتایا گیا ہے کہ غیر ملکی کرنسی کے تبادلے کے نام پر بڑے پیمانے پر مالی بے ضابطگی اور خرد برد کے الزامات سامنے آئے ہیں۔ کروڑوں روپے بیرونِ ملک منتقل کرنے کا الزام بھی سامنے آیا ہے۔ اسی سلسلے میں تفتیش کاروں نے جنوبی کولکاتا کے دو مقامات پر چھاپے مارے۔ دو کمپنیوں کے دو عہدیداروں کے گھروں پر صبح سویرے سے ہی تلاشی جاری ہے۔ کاروباری افراد کے بینک اکاو¿نٹس اور کمپنیوں کی دستاویزات کی جانچ کی جا رہی ہے۔
تفتیش کاروں کو اطلاع ملی تھی کہ بڑی مقدار میں غیر ملکی کرنسی کا لین دین کیا گیا ہے۔ تحقیقات کے دوران پتہ چلا کہ یہ نیٹ ورک پورے ملک میں پھیلا ہوا ہے۔ اسی لیے تفتیش کاروں نے مکمل تیاری کے ساتھ آج کارروائی کی۔ آج، بدھ کی صبح ملک بھر میں دہلی، کولکاتا اور بنگلورو سمیت کل 17 مقامات پر ای ڈی کی تلاشی جاری ہے۔ کولکاتا میں دو کاروباری افراد کے گھروں پر صبح سے ہی کارروائی جاری ہے۔ ان کی کمپنیوں کی دستاویزات کی جانچ کی جا رہی ہے۔ آج صبح بالی گنج اور نیو علی پور میں ان کاروباری افراد کے گھروں اور دفاتر پر چھاپے مارے گئے۔ سکیورٹی کے لیے مرکزی فورس کے جوان بھی موجود تھے۔
کچھ عرصہ قبل بھی ای ڈی کے افسران نے کولکاتا کے متعدد مقامات پر چھاپے مارے تھے۔ نارکل ڈانگا، نیتاجی نگر اور رابندر سروور سمیت کولکاتا کے کئی علاقوں میں یہ کارروائی کی گئی تھی۔ الزام تھا کہ چٹ فنڈ کے ذریعے بازار سے بڑی مقدار میں رقم جمع کی گئی تھی۔ بعد میں یہ الزام سامنے آیا کہ اس رقم کو مختلف رئیل اسٹیٹ کاروبار میں لگایا جا رہا تھا۔