شوکت ملا کے خلاف بی جے پی نے پولس میں شکایت کی ، سی بی آئی کی تفتیش کا مطالبہ

دھماکے کے مقدمے میں این آئی اے کے ہاتھوں گرفتار شوکت ملا کے خلاف ایک مختلف الزام کے ساتھ بی جے پی نے پولیس کا دروازہ کھٹکھٹایا ہے۔ اس بار ترنمول کانگریس کے سابق ایم ایل اے کی تعلیمی قابلیت پر سوال اٹھے ہیں۔ الزام ہے کہ بھانگر کے ترنمول امیدوار نے الیکشن کمیشن کے حلف نامے میں جھوٹی معلومات دی ہیں۔ شکایت کنندہ کو شبہ ہے کہ وہ جعلی اسناد کے بڑے چکر میں ملوث ہو سکتے ہیں۔ اس سلسلے میں پولیس میں شکایت درج کرائی گئی ہے۔
شوکت کینگ پور مشرقی کے ایم ایل اے تھے۔ 2026 کے اسمبلی انتخابات سے قبل ممتا اور ابھیشیک بنرجی نے انہیں بھانگر کا مبصر مقرر کیا تھا۔ اس بار شوکت بھانگر سے امیدوار ہیں۔ انتخابی حلف نامے میں انہوں نے اپنی تعلیمی قابلیت پوسٹ گریجویٹ بتائی ہے اور دعویٰ کیا ہے کہ انہوں نے سنگھانیہ یونیورسٹی سے پولیٹیکل سائنس میں ایم اے کیا ہے۔
اب جنوبی 24 پرگنہ کے بی جے پی لیڈر ابھیجیت داس کا الزام ہے کہ ”شوکت کی پوری تعلیم جعلی ہے۔” ان کا سوال ہے کہ ایک سابق عوامی نمائندہ ایم ایل اے کی ذمہ داری سنبھالتے ہوئے باقاعدہ کورس میں راجستھان سے ایم اے کیسے کر سکتے ہیں؟ کیا وہ کلاسز کے لیے ہوائی جہاز سے جاتے تھے؟ ابھیجیت نے طنز کیا کہ ”وہ پانچویں-چھٹویں جماعت تک پڑھے ہیں۔ ان کی پارٹی لیڈر خود کہہ چکی ہیں کہ وہ زندگی بھر بم بناتے رہے۔ یہ شخص کبھی کمیشن میں کہتا ہے کہ اس نے ہائی سیکنڈری پاس کی ہے، کبھی کہتا ہے گریجویٹ ہے، اور اب کہہ رہا ہے ایم اے کر لیا!“ بی جے پی قیادت کا الزام ہے کہ شوکت نے انتخابی حلف نامے میں تعلیمی قابلیت کے بارے میں جو معلومات دی ہیں وہ جھوٹی ہیں۔