بقایا تنخواہ کے مطالبے پر صفائی کارکنوں کا احتجاج، جلپائی گوڑی میں خدمات بند

جلپائی گوڑی میونسپلٹی کے صفائی کارکنوں نے بقایا تنخواہوں کی ادائیگی کے مطالبے پر پیر کو احتجاج شروع کر دیا۔ انہوں نے شہری ادارے کے دفتر کے مرکزی دروازے کو بند کر دیا اور باہر سڑک پر کچرا پھینک دیا۔
جھاڑو لگانے اور دیگر صفائی کی خدمات انجام دینے والے کارکنوں نے صبح تقریباً 9 بجے احتجاج شروع کیا، جو شام 5 بجے تک جاری رہا۔ چند روز قبل بھی کارکنوں نے تنخواہ نہ ملنے کے خلاف اسی طرح احتجاج کیا تھا۔ ایک ماہ کی تنخواہ ادا کر دی گئی، لیکن کارکنوں کا الزام ہے کہ مزید ایک ماہ کی تنخواہ اب بھی بقایا ہے۔
صفائی کارکن کلیانی راو¿ت نے کہا، ”ہمیں ابھی تک ایک اور ماہ کی تنخواہ نہیں ملی ہے اور یہ بھی واضح نہیں کیا گیا کہ ہمیں یہ رقم کب ملے گی۔ اس کے علاوہ درگا پوجا سے پہلے بونس کی ادائیگی کے بارے میں بھی کوئی وضاحت نہیں ہے۔“صفائی کارکنوں کی یونین کے سکریٹری منیش راو¿ت نے کہا کہ اس وقت میونسپلٹی میں کوئی منتخب سیاسی بورڈ موجود نہیں ہے، اس لیے ضلع کے افسران امور سنبھال رہے ہیں۔
راو¿ت نے کہا، ”ہم نے بار بار حکام کو اپنے مسائل سے آگاہ کیا ہے، لیکن کوئی حل نہیں نکلا۔ اس لیے ہم پیر سے تمام صفائی کا کام روکنے پر مجبور ہوئے، کیونکہ شہری ادارہ چلانے والے افراد نے ہماری بقایا تنخواہ اور دیگر مسائل پر ہم سے کوئی بات چیت نہیں کی۔“اس احتجاج کے باعث شہر کے تمام 25 وارڈوں میں شہری خدمات متاثر ہونے کا خدشہ پیدا ہوگیا۔ میونسپلٹی کے تحت مختلف خدمات میں تقریباً 300 مستقل اور عارضی صفائی کارکن کام کرتے ہیں۔ایگزیکٹیو افسر دیبدلال پاترا نے کہا کہ کارکنوں کی بقایا تنخواہوں کے معاملے سے ریاست کے شہری ترقی اور میونسپل امور کے محکمے کو آگاہ کر دیا گیا ہے۔
انہوں نے احتجاج کرنے والے کارکنوں سے کہا، ”تنخواہ کے مسئلے کو جلد از جلد حل کرنے کی کوشش کی جا رہی ہے۔“اس یقین دہانی کے بعد کارکنوں نے شام تقریباً 5 بجے ناکہ بندی ختم کر دی۔ تاہم، پورے دن میونسپل خدمات بری طرح متاثر رہیں۔منیش نے کہا، ”اگر حکام نے بقایا تنخواہ اور پوجا بونس کی ادائیگی کے بارے میں واضح فیصلہ نہیں کیا تو ہم دوبارہ احتجاج شروع کریں گے۔“