بیر بھوم سے مشرف کو امیدوار بنائے جانے پر پارٹی کے لوگ ناراض

بیر بھوم کے مرارئی اسمبلی حلقہ میں ترنمول کانگریس کے امیدوار کے انتخاب کو لے کر پارٹی کے اندرونی اختلافات اب کھل کر سامنے آگئے ہیں۔ سبکدوش ہونے والے ایم ایل اے ڈاکٹر مشرف حسین کو دوبارہ امیدوار بنائے جانے پر مقامی کارکنوں کے ایک حلقے میں شدید عدم اطمینان پایا جا رہا ہے، جس کی تپش خود رکن پارلیمان شتابدی رائے کی میٹنگ تک جا پہنچی۔مرارئی میں امیدوار کے نام کے اعلان کے بعد سے ہی ترنمول کے اندر واضح تقسیم نظر آرہی ہے۔ تنازع کی بنیادی وجوہات یہ ہیں۔ مقامی لیڈروں کا ایک بڑا طبقہ چاہتا تھا کہ سابق ایم ایل اے آنجہانی عبد الرحمن کے بیٹے سنجیب الرحمن (باپا) کو امیدوار بنایا جائے۔پتھر کے تاجر علی خان بھی امیدوار بننے کی دوڑ میں شامل تھے، جس نے صورتحال کو مزید پیچیدہ بنا دیا۔