ڈائمنڈ ہاربر سے ایسپلینیڈ تک چلے گی میٹرو؟ محکمہ بلدیات کا چار لین والی بڑی ہائی وے بنانے کا منصوبہ

کولکتہ کے ساتھ ساتھ ریاست میں بھی میٹرو سروس کو وسعت دی جائے گی۔ اس سے ٹریفک کے مسائل میں کمی آئے گی اور سفر بھی آرام دہ ہو جائے گا۔ اسی بات کو مدنظر رکھتے ہوئے، محکمہ بلدیات (Urban Development Department) ڈائمنڈ ہاربر کی طرف سے براہ راست ایسپلینیڈ (Esplanade) تک میٹرو نیٹ ورک جوڑنے کے بارے میں سوچ رہا ہے۔ اگر مستقبل بعید میں یہ منصوبہ عملی شکل اختیار کرتا ہے تو اس سے جنوبی 24 پرگنہ کے ساحلی علاقوں کے لوگوں کو زبردست فائدہ ہوگا۔
منگل کے روز منعقدہ ایک میٹنگ میں کولکتہ اور ہاوڑہ کو مرکز بنا کر دریا? گنگا کے دونوں کناروں کی خوبصورتی اور ترقی کے حوالے سے متعدد منصوبے مرتب کیے گئے ہیں۔ گنگا کے دونوں کناروں پر 4 لین والی ہائی وے بنانے کا منصوبہ بنایا جا رہا ہے، جس میں پیدل چلنے والوں اور سائیکل سواروں کے لیے الگ راستے رکھے جائیں گے۔ اس کے علاوہ، گنگا کے کنارے واقع تاریخی گھاٹوں اور قدیم مندروں کی مرمت، دیکھ بھال اور خوبصورتی کا بندوبست کیا گیا ہے۔
محکمہ بلدیات کا مقصد نوبدیپ اور مایا پور کو بین الاقوامی معیار کے روحانی اور زیارتی سیاحتی مرکز (Spiritual Tourism Center) کے طور پر تیار کرنا بھی ہے۔ اس کے لیے نوبدیپ میونسپلٹی کے ساتھ ایک مفاہمت نامے (MoU) پر دستخط کیے گئے ہیں۔ دنیا بھر سے آنے والے عقیدت مندوں کی سہولت کے پیش نظر یہ فیصلہ لیا گیا ہے۔
محکمہ بلدیات و شہری ترقی کی وزیر اگنی مترا پال کے مطابق: "بنگال کی روایت و ثقافت کا احترام کرتے ہوئے، جدید بنیادی ڈھانچے (انفراسٹرکچر) اور بہتر شہری خدمات کے ذریعے کولکتہ، ہاوڑہ اور نوبدیپ کو نئی بلندیوں پر پہنچانا ہی ہمارا مقصد ہے۔”
یہ بات قابل ذکر ہے کہ نئی حکومت کولکتہ کی بھی مکمل کایا پلٹ کرنے کا ہدف رکھتی ہے۔ کالج اسٹریٹ کے بوئی پاڑا (کتابوں کی مارکیٹ) اور چائنا ٹاو¿ن کو غیر ملکی طرز پر سجانے اور سنوارنے کا بلیو پرنٹ تقریباً تیار کر لیا گیا ہے۔ اس کے علاوہ، ہائیکرز اور پھیری والوں کی بحالی کے لیے جدید دکانیں بنانے کا منصوبہ بھی زیر غور ہے۔ فوڈ پارکس، مارکیٹس اور ٹینٹس کے ذریعے تجارتی مواقع میں اضافہ کیا جائے گا، جس سے کولکتہ کی صورتحال مکمل طور پر بدل جائے گی۔