ہوگلی میں سمرتی ایرانی کی آو¿ بھگت میں ‘کمی’، غصے میں آکر پہلابیساکھ کی تقریب چھوڑ کر چلی گئیں

پوئلا بوشاکھ (بنگالی نیا سال) کے موقع پر تمام جماعتوں نے اپنی انتخابی مہم تیز کر دی ہے اور امیدوار عام لوگوں تک پہنچ رہے ہیں۔ بدھ کے روز ہوگلی کے گھڑی موڑ پر سمرتی ایرانی کا ایک جلسہ ہونا تھا، لیکن وہیں بدمزگی پیدا ہو گئی۔ ضلعی قیادت کی جانب سے خاطر خواہ استقبال نہ ہونے پر بی جے پی کی سینئر رہنما پروگرام بیچ میں ہی چھوڑ کر روانہ ہو گئیں، جس پر سیاسی حلقوں میں بحث چھڑ گئی ہے۔
معاملہ کیا تھا؟ پوئلا بوشاکھ کے سلسلے میں ہوگلی کے چنچورہ کے گھڑی موڑ پر بی جے پی کی جانب سے ایک خصوصی تقریب کا اہتمام کیا گیا تھا، جس میں سمرتی ایرانی نے شرکت کرنی تھی۔ وہ مقررہ وقت پر پنڈال پہنچ گئیں، جہاں انہیں اسٹیج سے ‘انپورنا بھنڈار’ کا افتتاح کرنا تھا۔ الزام ہے کہ وہاں پہنچنے پر سمرتی نے دیکھا کہ ضلع صدر غیر حاضر ہیں۔ یہی نہیں بلکہ سمرتی ایرانی کے استقبال کے لیے بی جے پی کا کوئی اعلیٰ سطح کا لیڈر بھی موجود نہیں تھا اور نہ ہی کوئی خاص انتظامات کیے گئے تھے۔
بی جے پی ذرائع کے مطابق ضلعی قیادت کے اس سرد رویے پر سمرتی ایرانی سخت برہم ہوئیں اور فوری طور پر پروگرام چھوڑ کر جانے کا فیصلہ کیا۔ صورتحال کو بگڑتے دیکھ کر وہاں موجود بعض کارکنوں نے انہیں روکنے کی کوشش کی، لیکن وہ نہ مانیں اور پروگرام سے روانہ ہو گئیں۔