سسر نے کلہاڑی مارکر اپنی بہو کی جان لے لی

نادیہ کے پلاشی پاڑہ تھانہ کے گوپی ناتھ پور پنچایت علاقے میں جائیداد کے تنازع پر ایک سسر کی جانب سے اپنی بہو کو کلہاڑی سے حملہ کر کے قتل کرنے کا لرزہ خیز واقعہ سامنے آیا ہے۔مقتولہ کی شناخت 27 سالہ شمپا وشواس کے طور پر ہوئی ہے، جن کی شادی چند سال قبل اتم وشواس نامی نوجوان سے ہوئی تھی۔مقامی لوگوں کے مطابق اتم کے خاندان اور ان کے چچا سفل وشواس کے درمیان جائیداد کو لے کر طویل عرصے سے جھگڑا چل رہا تھا۔جمعہ کے روز دونوں خاندانوں کے درمیان تلخ کلامی شدت اختیار کر گئی۔ جھگڑے کے دوران غصے میں آکر سفل وشواس نے اپنی بہو شمپا پر تیز دھار ہتھیار (کلہاڑی) سے حملہ کر دیا اور ان کی گردن پر وار کیا۔شور مچنے پر پڑوسی وہاں پہنچے اور شمپا کو خون میں لت پت حالت میں پلاشی پاڑہ دیہی اسپتال لے گئے، جہاں ڈاکٹروں نے انہیں مردہ قرار دے دیا۔واقعے کے بعد 52 سالہ ملزم سفل وشواس مفرور ہو گیا تھا۔پولیس نے رات بھر تلاشی مہم چلانے کے بعد ہفتہ کے روز ملزم کو گھر کے قریب ہی ایک جگہ سے گرفتار کر لیا ہے۔پولیس اس قتل کے پیچھے چھپی مزید وجوہات کی تحقیقات کر رہی ہے۔