طویل لو اور شدید گرمی کے بعد اب بارش کا امکان

جنوبی بنگال کے باشندوں کے لیے علی پور محکمہ موسمیات کی یہ پیش گوئی راحت کی خبر لائی ہے۔ طویل لو اور شدید گرمی کے بعد اب کالبیساکھی اور بارش کے امکانات پیدا ہو گئے ہیں۔جنوبی بنگال کے ۱۱ اضلاع میں ۵۰ سے ۶۰ کلومیٹر فی گھنٹہ کی رفتار سے طوفانی ہوائیں چل سکتی ہیں۔ہفتہ سے ہی شمالی ۲۴ پرگنہ، مرشد آباد، نادیہ، بیربھوم، مشرقی اور مغربی بردھوان، بانکورہ، پورولیا، جھاڑگرام اور مغربی مدنا پور میں الرٹ جاری کر دیا گیا ہے۔اتوار سے کولکتہ میں آندھی اور بارش کا امکان ہے۔کولکتہ سمیت جنوبی بنگال کے تمام اضلاع میں یہ موسم آنے والے جمعہ تک برقرار رہ سکتا ہے۔اس دوران گرج چمک کے ساتھ بارش کے ساتھ ساتھ ۴۰ سے ۵۰ کلومیٹر فی گھنٹہ کی رفتار سے تیز ہوائیں چل سکتی ہیں۔گزشتہ چند دنوں سے مغربی اضلاع میں شدید ہیٹ ویو کی صورتحال بنی ہوئی تھی۔ سورج کی تپش سے جب لوگ بے حال تھے، ٹھیک اسی وقت کالبیساکھی کی اس پیش گوئی سے عام لوگوں کو دم گھٹنے والی گرمی سے عارضی نجات ملنے کی امید ہے۔