”باتھ روم جا رہا ہوں“ کہہ کر ایکسپریس ٹرین سے مسافر نے چھلانگ لگائی! بیلدا کے قریب ریلوے پولیس نے لاش برآمد کی

چارلاپلی ایکسپریس سے آسام کے ایک ریلوے مسافر نے چھلانگ لگا دی۔ پیر کو مغربی مدناپور کے بیلدا میں سشندا ریلوے کراسنگ کے قریب واقع نیا ن ج±لی سے اس کی لاش برآمد کی گئی۔ تفتیش کار ابتدائی طور پر اسے خودکشی کا معاملہ سمجھ رہے ہیں۔ریلوے ذرائع کے مطابق متوفی کا نام ڈیوڈ ٹگّا تھا۔ اس کی عمر صرف 32 سال تھی۔ آسام کا رہنے والا یہ نوجوان ایک رشتہ دار اور ایک دوست کے ساتھ حیدرآباد سے آسام واپس جا رہا تھا۔ وہ چارلاپلی ایکسپریس میں سوار ہوا تھا۔ڈیوڈ کے رشتہ دار کے مطابق اتوار کی رات بیلدا ریلوے اسٹیشن گزرنے کے بعد نوجوان نے اچانک ٹرین سے چھلانگ لگا دی۔ وہ لوگ شور مچانے لگے۔ ٹرین کے ٹی ٹی ای اور ریلوے پولیس کی مدد سے وہ ٹرین سے اترے اور ڈیوڈ کی تلاش شروع کی، لیکن رات کے اندھیرے میں اس کا کوئی سراغ نہیں مل سکا۔

پیر کی صبح ڈیوڈ کے رشتہ دار اور دوست نے کھڑگپور جی آر پی دفتر سے رابطہ کیا۔ بالآخر سشندا ریلوے کراسنگ نمبر 26 کے قریب سے ڈیوڈ کی لاش برآمد ہوئی۔ پوسٹ مارٹم کی کارروائی شروع کر دی گئی ہے۔ابھی یہ واضح نہیں ہوسکا ہے کہ اس نے ٹرین سے چھلانگ کیوں لگائی۔ معاملے کی تحقیقات شروع کر دی گئی ہیں۔متوفی کے چچا زاد بھائی رمیش ٹگّا نے بتایا، ”میں اور میرا بھائی حیدرآباد میں کام کرتے تھے۔ اس کی طبیعت خراب ہونے کی وجہ سے اسے واپس لے جانے کے لیے گھر سے دو لوگ آئے تھے۔ میں بھی ان کے ساتھ آسام واپس جا رہا تھا۔“

انہوں نے مزید بتایا، ”اتوار کی رات ہم نے ٹرین میں ایک ساتھ کھانا کھایا تھا۔ تقریباً ساڑھے 10 سے 11 بجے کا وقت ہوگا۔ وہ باتھ روم جانے کی بات کہہ کر اٹھا اور ٹرین سے چھلانگ لگا دی۔ تاہم میں نے یہ واقعہ خود نہیں دیکھا۔ کسی سے معلوم ہونے کے بعد میں گیٹ کی طرف دوڑا۔ میں نے چین کھینچ کر ٹرین روک دی۔“